Sunday 1 February 2009

يعني ليش القرف ؟؟

عنجد إشي بيقهر... و كتير استفزازي,و مش أول مره بلاحظ هاي الشغله..بالعكس دايما بشوفها وين ما رحت و جيت , يا أخي قبل يومين كنت في مكه مول,عم نتسوق و نشوف شو قصة هالتنزيلات الغريبه (بالنهاية طلع إشي فاشل) المهم خلال مشينا في المول مرت من جنبي بنت اللي لفت نظري إلها طريقة مشيها اللي كتير كتير مصطنعه و ضاربه بوز شبرين و مش طايقه حتى النفس اللي بتتنفسوا و بتتطلع من فوق لتحت في هالمخاليق تقولوا قاتلينيلها قتيل مش هيك !!! طيب ماشي عديناها في كتير من هاد الستايل..و اعتبرتها حاله فرديه,بس بعدين دخلت على محل و كان في صبيتين عم بيشتروا أواعي يعني لو تقولوا مناظرهم رايحين على جبهة حرب مش هيك.. معصبين و حالتهم حاله.. حتى في غرفة القياس يعني على شوي وحده منهم رح تطاوش مع حالها في المراي..حتى البايعين مش طايقين حالهم .. في محل تاني عجبتني قطعه (صراحه هدية كانت) و كنت بس بدي أسأل إذا في مقاس تاني..لولا العيب الصبيه اللي سألتها كانت رح تلطشني كف من الآخر...إنو طولي بالك هاد شغلك !! طبعا على الرغم من تصرفها المقرف رحت أحاسب..(صبيه تانيه على الكاش) يعني بالعافيه تفهمت منها إنو إذا بقدر أبدل الهدية أو لأ !! دخيل الله طولوا بالكم يعني..يعني الواحد طالع يغير جو برجع متنكد أكتر..ما في أي داعي لهل الحركات يلي إنتو بتفكروا إنها بتعمل قيمه أو هيبه لشخصيتكم المعدومه ..صراحة !!! حتى لو إنتو متدايقن..ما إنتو طالعين تغيروا جو..كمان بتكشروا في الطلعه !! و فعلا متلازمة الكشرة المصطنعه يعني منتشره في البلد بشكل فظيع..مو أظن السبب واحد كلهم مشان يبينوا إنهم قرفانيين و عايفين هالعيشه و إنو مشان الله حلوا عنا مش طايقينكم.. على فكره هاي المتلازمه جدا جدا متلازمه مع الطبقات العليا من المجتمع بعد التجربة و الملاحظه !!!
شكرا

3 comments:

Whisper said...

انا معك 100% بهالحكي
و ياويلك ازا ضحكتي او ابتسمتي...بيعطوكي نظره انو مش عيب عليكي ؟؟؟ بتطلعي طلعه و بتضحكي ومبسوطه كمان
وانسي الجحر...العالم مش طايقه بعضها و بتنزل جحر فيكي...بتطلعي عليها انو عيب عليكي اكسري عينك انا شايفتك بس ابدا انت بتلفي وجهك و همه لسا بجحرو
اشي بكئب بصراحه :$

Ashwaq Shaheen said...

فعلا هاي ظاهرة كمان منتشره .. الله يبعد عنا الكشره شو بكرها..صرت أتمنى اشوف صبيه بتضحك هالأيام أمنية حياتي هاهاها... شكرا على التعليق

http://blogs.albawaba.com/khaledalsoud said...

تحية .. ول ويسبر كمان :
بتعرفي من زمان زمان بطلت أطلع وآجي وكتير اختصرت الأماكن العامة وأكبر مول بروح عليه الفريد او السي تاون وغصب عني مشان اغراض البيت .. حتى زوجتي قرفتني لا بطلع ولا على بالي وبتضطر تطلع بدوني مع صاحبتها مع اختها ايش ما كان بس انا قرفان