توجيهي 2009 هلا عمي

مش مصدقه إنو مرت سنه كامله على نتائج التوجيهي !! بالضبط مثل هذا اليوم كنت ميته من الرعب مش قادرة أفكر بأي إشي إلا إنو إذا ما جبت معدل عالي أو حتى يلي ببالي شو ممكن يصير.. و شو رح يكون ردة فعلي :) طبعا أهلي من حد ما بلشت بالتوجيهي و أهلي ما تركوا هالسيرة قدام أي مخلوق بيعرفوا : هاااا و الله لترفع راسنا .. هاي شاطره..دايما الأولى على صفها (طبعا مش الأولى بس كنت من الشاطرين ) و من هالحكي

طبعا يوم النتائج يعني ممكن أحكي إنو الإحساس بأي إشي كان معدوم..كنت مخدره نوعا ما..أهلي.. تقريبا كانو كلهم موجودين..بتذكر لما الصحيت الصبح ,ضويت الكمبيوتر و شغلت الراديو,وقفت على الشباك و تمنيت أسمع زمور سياره لناس ناجحه بلكي بيعطيني أمل !! أمي كانت نوعا ما تتجنب إنو نحكي مع بعض و فعلا أحسن لأني ما كنت طايقه أحكي..لما قرب موعد النتائج رحت على الكمبيوتر و إذا به معلق !! أنا كان فيّ عقل و طار..صرت أصرخ و أضرب في الجهاز و مش إني أفكر أصلحه لا أبدا..أختي إجت و بعدتني عنه و أنا رحت أشوف إمي مع مين كانت عم تحكي..أكيد مع جارتنا يلي كمان إبنها توجيهي..و كانت في تلك اللحظه بتحكي لإمي إنو نجح و جاب معدل 75 و شغله !! طبعا انا خف عقلي . وإمي باركتلها و سكرت الباب و ما سمعت غير أختي بتنادي تعالي تعالي هي اسمك أنا رحت ركضت و بحلقت بالشاشه و مسكت بالمكتب بقوة و قلبي على بيدق بسرعة خرافية و أول مادة كانت تربية اسلامية و كنت جايبة فيها 86 من 100 طبعا أنا بلعت ريقي و قلت يا حبيبي الله يستر و صرت أشوف المواد و حدة وحدة كنت فعلا أرجف و و إمي و خواتي فوق راسي..اختي التانيه أعطتني الآله الحاسبه إنو أحسب المعدل..أول مره ما زبطت لأني خربشت برقم تاني مره برضو ما زبطت لأني ما جمعت... يعدها قلت خلص يعني يلي بدو يصير يصير لأني خلص فقعت.. لما خلصت الجمع و قسمت على المجموع طلع معي رقم 0.926 و أرقام تانه مش مترذكره الباقي..أن إنو لاااا شو بالتسعين بس بلاش !! ضربت ب 100% و فعلا طلع 92.6 !1 رميت الآله و صرت أصرخ جيبت بالتسعين و أخيرا و أصرخ بالبيت قد ما الله أعطاني صوت خواتي و إمي يلحقوا وراي و أنا أركض و أصرخ جيبت بالتسعين (ما كان هاممني الرقم قد ما كان هاممني إني كسرت عقدة التسعين بالبيت) و بعدها حاولت أهدا بس مع التليفونات يللي ما وقفت ما قدرت أسيطر على حالي..حتى إني ما طلعت بالسياره و نزمر فيها (بس عوضتها بالتخريج ما شاء الله يخزي العين هاهاها) قد ما كان عجقا الوضع !!!!! طبعا طلعنا على المطعم مع العائله بمناسبة النجاخ البااااهر

فعلا يوم ما بنسى بحياتي !! على قد ما بحقد على سنة التوجيهي و بكرها من كل قلبي !! كلو على بعضوا هالنظام التوجيهي أنا بكرهوا !! بتصير عبد للوقت و الدراسه..بتنسى كليا إنك بني آدم (إذا كنت بدك تجيب علامة ) أو ما بتدرس و بتحول تعتبرها سنة طبيعية (و هيك رح تبقى معقد طول عمرك من إشي اسمو التوجيهي) فيعتي بالحالتين مش خلصانين..كل أمة محمد يلي بتحبك و بتكرهك و ما بتطيقك و بتموت عليك و يلي حكيت معهم يدوب مرة مرتين بيتذكروك و بيحلالهم النصائح الفتّاكه ّّ الله أكبر..لسه غير الحصار يلي بصير عليك ممنوع تغدر البيت بدون إذن يقبل من جميع الأطراف..ممنوع تلفزيون و انترنت طول اليوم..بس ربنا الله في الحصار الواحد اتدلل دلال غير شكل سندويشات رايحه و صحون راجعه, و شاي و عصير و كل اشي بتتطلبه متوافر, و إذا لم يكن فطلبات التوصيل جاهزة دائما

الحمد الله مليون مرة يلي خلّصت منها على خير و سلام والله لا يعيدها من أيام ... مبروك للتوجيهي 2009 لسه قدامكم فصل تاني :) نا نا نا نااااااااا هاهاهاهاهاها