طبعا هاد أول موضوع بكتبه بالعربي (إذا فينا نعتبر العاميه إنها عربي علما إنو في مواضيع راح تكون بالفصحه ) المهم و بما إنو أول موضوع فيمكن لازم يكون شوي مهم و يمكن لأ ...المكتوب مبين من عنوانه,وبما إني طالبه في الجامعه الأردنيه (مع إني لسه سنه أولى) بس عندي ملاحظات و جاي على بالي أكتبها... هلأ الجامعه الأردنية معروفه إنها من أحسن الجامعات على مستوى الشرق الأوسط, مع إني شوفت على موقع بيتعلق بترتيب الجامعات على مستوى العالم/أوروبا/الوطن العربي ..الخ و كان ترتيبها رقم 36 !! ما بعرف صراحه على أي أساس مرتبينهم ( اكاديمي ولا مادي و لاخبره) ما علينا بتضل أحسن ما هو متوفر في الوقت الحالي !!! المهم ملاحظاتي ما راح تكون من الناحية الأكاديميه, قد ما راح تكون عن الجامعه نفسها
هلأ بعرف إنو الجامعه من سنة 1962 و بعرف إنو هذا يدل على العراقة و الأصالة بسسسسس المباني كثير قديمه و ما عم ينعمللها صيانه منيحه إلا من رحم ربي و يلي هي مباني عم تنبنى جديد أو مبنيه جديد و لسه هدول جاييهم الدور بالحكي, يعني صار معي موقف ذات يوم كان عندي امتحان في مبنى الكليات الإنسانيه ,هلأ القاعه كبيره زي البحر مشان يحطوا كل نفر في جهة و ما حدا يغش,بس شو عليها إضاءة من الآخر,و الستاير يلي بتغم على نفس الواحد و يا ريت يشيلوها أحسن من الغبره يلي بتهف علينا كل ما إجت نسمة هوا, المهم خلصت من الإمتحان و طلعت من القاعه و فعلا فعلا كانت إضاءة المبنى بالمره يعني الدنيا مغرب و الواحد طالع من الامتحان مش شايف الفضا و إضاءه (خافته) مشان يكتمل الوضع, وحتى بتخيل لون الدهان مش مناسب أبدا أبدا للمبنى أو خلينا نقول مش مناسب لهيك جو أكاديمي صراحة, و على فكره حتى بالنهار الوضع نفسه إلا فترة العصر ربنا الله
المهم النقطه التاليه ويلي كتير كتير لفتفت نظري في الجامعة وهي بيع الدخان في الكفتيريات في الجامعه !! إنو هدوا الوضع شوي .. مش هيك يعني بدل ما نخفف من نسبة المدخنين في البلد و خاصة بين الشباب و الجيل الجديد لا عم نجيب دخان للجامعه و بنبيعه عيني عينك .. فعلا نحنا ناس فايعه و على الموضه !! و لشو نمنع التدخين في الأماكن العامة هاي كلها فلسفة و حركات ما إلها داعي نحنا لازم نبين إنو نحنا ناس تعيبه و معصبين و ما ورانا غير كاسة النسكافية و السجاير إيه شو السيرة !! هلأ جد بحكي و مش لأني ضد الدخان و التدخين بس مشان نحنا في مكان (الجامعه) عم نحاول بس مش أكثر إنو نصلح من الوضع يلي نحنا عايشين فيه و نحسن من عقليتنا و تفكيرنا,يمكن في ناس تستهجن هل الحكي بس هاي التفاصيل هي يلي بتعمل فرق و أنا يا سيدي ما بدي أمنع التدخين بس على القليله يكون في أماكن مخصصه يدخنوا فيها حتى لو بدهم يطنشوا محاضراتهم عادي ما نحنا فايعين !! و الناس مش مجبورة تشم ريحة الدخان في الجامعه, و اصلا ممنوع التدخين داخل المباني و الكليات,حتى لو بتدخن على الشباك!! ما راح أكمل الموضوع للآخر لأنو طويل و بدو قعده و في أشياء تانيه لازم تنذكر
هلأ الجامعه اسم الله عليها مدينه, و انا مش معارضه على كبرها أو طولها أبدا أبدا بس مش إنو الواحد يضيع في الجامعه و ما يعرف وين هو إلا لما ينقطع نفسه, هلأ هاد الحكي يمكن ما بيهم طلاب الجامعه يلي حفظوا الجامعه بعد مليون سؤال من فلان و فلانه !! و هاد يلي صار معي في أول أيام الجامعة وين العمادة,,وين كلية الآداب,,وين مدرج 3 ,, ولسه يمكن الله رحمني إنو ما حد مقلبني و دلني على محل غلط كنوع من خفت الدم .. مش طالبه أكثر من إشارات تسهل هل الموضوع مش بس على الطلاب العرب الوافدين و الأردنيين و حتى الطلاب الأجانب يلي بيدرسوا في مركر اللغات العجيب :) فعلا الجامعه بدها إشارات على الأقل حتى تعرف كليتك !!وعلى فكره الخريطه الموجوده للجامعه والمفروض إنها مصممه مشان تساعدك و تخليك تعرف وين إنت معقده و مش مفهومه , للأسف. و إذا هل الفكره خرافيه و غير قابلة للتنفيذ ممكن بكل بساطة إنكم تصمموا خريطة للجامعه و تكون "مفهومة" لناس ما بتعرف تقرأ خرائط و ولا عمرها مسكت خريطة (مش بالضرورة تكون فلسلفة الشغله)...و تتوزع في أكثر من مكان بالجامعه و خصوصا للطلاب الجداد,يمكن هاد أفضل حل و ما رح يكلف كتير..كلها كم من ورقة بسيطة..نحنا بنحب نقطع شجر كتير و هيك هيك مستهلكين ورق
الشي التاني أو الثالث عنجد مش طبيعي في الجامعه هو الحمامات.... إيش وضعهم ؟؟ يعني أنا باخد محاضرة في كلية العلوم التربوية و القاعه نوعا ما قريبة على الحمام للأسف الشديد...يعني إشي بيسد النفس و التفكير سوا !! فعلا مش معقول.. إذا هيك الريحه فكيف الحمام نفسه !! جد جد عيب ..يعني ما بدي أحكي أكثر من هيك إشي بيقرف و طبعا الحمامات غير قابله للإستخدام و يمكن هون بلوم الجهتين الجامعه و الطلاب !!! مع العلم إنو مبنى العلوم التربوية مش كتير قديم حسب ما يبدو لي.... و إذا كنتوا كتير كتيرمضطرين تروحوا على الحمام أنصحكم بزيارة حمامات مركز اللغات العجيب :).... و هي أنا حكيت إذا كنتوا مضطرين
بالنسبة لموقع الجامعه, لما يبلش الموسم سواء تسجيل أو سحب و إضافه أو مشان تعرف موعد امتحانك و موقعه أو حتى مشان تعرف إذا انقبلت في الجامعه و لا لأ, إنسى إنو كان في للجامعه موقع, و بدك تقضي يومك قدام الكومبيوتر و بس تحاول محاولات بائسه لتوصل للموقع و خمسين تليفون و قلق ليوم القلق... و بقلولك تابع الويب سايت .. أنا مش ضد الموقع بالعكس أنا كتير بستخدمه..بس لازم يلاقوا حل لمشكلة الضغط يلي بتصير على الموقع و خصوصا لما يكون الكل بحاجته
وعلى سيرة التسجيل بالله ممكن يكون مبنى التسجيل أصغر من هيك شوي !! يعني صار معي موقف أيام السحب و الإضافه أول الفصل,في عندي مادة حقوق إنسان و مش مكتوب عندي وين القاعه أو حتى اسم الدكتور على الجدول..و كان في بالي إني أحول الماده بس مش كتير للصراحه.. المهم خلصت محاضراتي و رحت على التسجيل و إذ بجماهير واقفين يمين و شمال (عكس بعض),يعني حاطين الشبابيك قبال بعض و المسافه ما بتستحمل أعداد كبيره,غير التهويه و الضغط المخيفين في المبنى وأكيد إنت و حظك إذا كانوا الطلاب يلي في الطابور عندهم مشاكل بالتسجيل,طبعا حاولت إني ألاقي محل أوقف فيه بس أبدا, فاختصرت الطريق و حملت حالي و روحت,بس عاودت رجعت تاني يوم مشان أعرف وين القاعه, مع إنه مبارح رحت مع صحباتي على التسجيل مشان نجيب هالشغله و ما أحلى زي الناس الشاطره
آخر شي لأني تعبت من الكتابه مش اكتر,صراحه ما بعرف إذا هو من ضمن اختصاصات الجامعه بس الباصات العامه يلي بتنقل الطلاب و يلي بتستخدم شارع الخدمات,يعني شفير الباص مش مستعد يوقف مشان يخلي الطلاب يقطعوا الشارع,مستعد يدعس طالب بس مشان يركب كم من واحد و ما بيفرق عندو إنو في كائن بشري ممكن يروح فيها أو إنو في طابور سيارات ورا بدها تمشي و عامله زفه ورا, أبدا كأنو في كوكب تاني مش فارق عندو حدا,كل همه بس يحصّل على كم من راكب بغض النظر عن البني أدمين يلي حوليه,حتى يلي بينادي على الركاب مستعد يصرخ في وجهك و يطرشك في سبيل إنو حصل على راكب..الشغله صار بدها تنظيم أكثر
على كل الأحوال الملاحظات يلي بيكتبها مش بس مشان إني بدي أنتقد و بس,أو أبين إنو الجامعه سيئه,لأ لأنو في أشياء غلط و غلط كتير, و إذا بدنا نضل ساكتين عمرنا ما راح نتطور,بعرف إنو ملاحظاتي مش هل إشي الفظيع أو ممكن تتطور الجامعه فيها بس ملاحظاتي هي مجرد حقوق أساسية مش أكتر !! و دمتم سالمين
Posts
